18 жасқа толғаннан кейін бала МӘМС жүйесінде сақтандырылған болып қала ма?
Көптеген ата-аналарды бала 18 жасқа толғаннан кейін МӘМС жүйесіндегі сақтандыру мәртебесі сақтала ма деген сұрақ мазалайды. Бұл оның оқуына, жұмысына немесе әлеуметтік мәртебесіне байланысты.
Егер бала 18 жасқа толса, бірақ мектепте оқуын жалғастырып немесе колледжде, жоғары оқу орнында күндізгі бөлімде білім алып жүрсе, мемлекет оның жарналарын төлеуді жалғастырады. Сондықтан сақтандырылған мәртебесі сақталады.
Егер баланың мүгедектігі болса, оның жасына қарамастан мемлекет МӘМС жарналарын төлейді. Бұл санат жеңілдікке ие азаматтарға жатады.
Ал егер 18 жасқа толған азамат оқымайтын әрі жұмыс істемейтін болса, ол ресми түрде жұмыссыз ретінде тіркеле алады. Мұндай жағдайда жарналарды жергілікті атқарушы органдар төлейді.
Егер азамат ресми түрде жұмысқа орналасса немесе жеке кәсіпкер ретінде тіркелсе, онда МӘМС жарналарын өзі төлейді және сақтандырылған мәртебеге ие болады.
МӘМС жүйесіндегі мәртебеңізді Qoldau 24/7, SaqtandyryBot Telegram-боты немесе 1414 байланыс орталығы арқылы тексеруге болады. Алдын ала мәртебені тексеру медициналық көмекті үздіксіз алуға мүмкіндік береді.
